ਪੀਲੀਆ (ਜੌਂਡਿਸ) ਉਦੋਂ ਹੁੰਦਾ ਹੈ ਜਦੋਂ ਚਮੜੀ ਜਾਂ ਅੱਖਾਂ ਦਾ ਚਿੱਟਾ ਹਿੱਸਾ ਪੀਲਾ ਹੋ ਜਾਂਦਾ ਹੈ। ਇਹ ਉਦੋਂ ਹੁੰਦਾ ਹੈ ਜਦੋਂ ਸਰੀਰ ਵਿੱਚ ਬਿਲੀਰੂਬਿਨ ਨਾਂ ਦਾ ਇੱਕ ਪੀਲਾ ਪਦਾਰਥ ਜਮ੍ਹਾਂ ਹੋ ਜਾਂਦਾ ਹੈ।
ਬਿਲੀਰੂਬਿਨ ਉਦੋਂ ਬਣਦਾ ਹੈ ਜਦੋਂ ਸਰੀਰ ਪੁਰਾਣੇ ਲਾਲ ਖ਼ੂਨ ਸੈੱਲਾਂ ਨੂੰ ਤੋੜਦਾ ਹੈ। ਆਮ ਤੌਰ ’ਤੇ ਜਿਗਰ (ਲਿਵਰ) ਇਸ ਨੂੰ ਪਿੱਤ (ਬਾਈਲ) ਵਿੱਚ ਕੱਢ ਦਿੰਦਾ ਹੈ, ਜੋ ਪਿੱਤ ਦੀਆਂ ਨਾਲੀਆਂ ਰਾਹੀਂ ਆਂਦਰਾਂ ਵਿੱਚ ਜਾਂਦਾ ਹੈ। ਪੀਲੀਏ ਦਾ ਮਤਲਬ ਹੈ ਕਿ ਇਸ ਰਸਤੇ ਵਿੱਚ ਕਿਤੇ ਕੋਈ ਚੀਜ਼ ਠੀਕ ਕੰਮ ਨਹੀਂ ਕਰ ਰਹੀ:
- ਲਾਲ ਖ਼ੂਨ ਸੈੱਲਾਂ ਦਾ ਬਹੁਤ ਤੇਜ਼ੀ ਨਾਲ ਟੁੱਟਣਾ, ਜਿਵੇਂ ਹੀਮੋਲਿਟਿਕ ਅਨੀਮੀਆ ਜਾਂ ਸਿਕਲ ਸੈੱਲ ਬਿਮਾਰੀ ਵਿੱਚ
- ਜਿਗਰ: ਹੈਪੇਟਾਈਟਿਸ (ਵਾਇਰਸ ਵਾਲੀਆਂ ਇਨਫੈਕਸ਼ਨਾਂ ਜਿਵੇਂ ਹੈਪੇਟਾਈਟਿਸ A, B, C ਜਾਂ E), ਸ਼ਰਾਬ ਨਾਲ ਜੁੜੀ ਜਿਗਰ ਦੀ ਬਿਮਾਰੀ, ਅਤੇ ਕੁਝ ਦਵਾਈਆਂ
- ਪਿੱਤ ਦੀਆਂ ਨਾਲੀਆਂ ਦਾ ਬੰਦ ਹੋਣਾ: ਪਿੱਤੇ ਦੀ ਪੱਥਰੀ (gallstones), ਅਤੇ ਪੈਨਕ੍ਰੀਅਸ (ਲਬਲਬੇ) ਦੀਆਂ ਸਮੱਸਿਆਵਾਂ ਜਿਵੇਂ ਪੈਨਕ੍ਰੀਆਟਾਈਟਿਸ (ਲਬਲਬੇ ਦੀ ਸੋਜ)
ਪੀਲੀਆ ਇੱਕ ਨਿਸ਼ਾਨੀ ਹੈ, ਆਪਣੇ-ਆਪ ਵਿੱਚ ਬਿਮਾਰੀ ਨਹੀਂ, ਅਤੇ ਵੱਡਿਆਂ ਵਿੱਚ ਇਹ ਕਿਸੇ ਗੰਭੀਰ ਗੱਲ ਦੀ ਨਿਸ਼ਾਨੀ ਹੋ ਸਕਦਾ ਹੈ, ਇਸ ਕਰਕੇ ਇਸ ਨੂੰ ਹਮੇਸ਼ਾ ਡਾਕਟਰ ਨੂੰ ਵਿਖਾਉਣਾ ਜ਼ਰੂਰੀ ਹੈ। ਨਵਜੰਮੇ ਬੱਚਿਆਂ ਵਿੱਚ ਇਹ ਆਮ ਹੈ ਅਤੇ ਅਕਸਰ ਨੁਕਸਾਨਦੇਹ ਨਹੀਂ ਹੁੰਦਾ (ਹੇਠਾਂ ਵੇਖੋ)।

