د متیازو د لارې انتان (UTI) د متیازو د لارې په هر ځای کې انتان دی: په مثانه کې، هغه نل کې چې متیازې له بدن څخه بهر وړي (urethra، د متیازو نل)، یا په پښتورګو کې. معمولاً هغه وخت پیدا کېږي چې د غایطه موادو بکتریاوې د متیازو لارې ته ننوځي.
UTI په بدن کې د انتان دوهم تر ټولو عام ډول دی. د نارینه وو په پرتله، شاوخوا څلور ځله ډېرې ښځې پرې اخته کېږي، ځکه چې د ښځو د متیازو نل لنډ دی او مقعد ته نږدې پروت دی.
- د مثانې انتان (cystitis) تر ټولو عام ډول دی.
- د پښتورګو انتان (pyelonephritis) لږ عام دی خو ډېر جدي دی، او ژر درملنې ته اړتیا لري.
ډېری UTI په اسانۍ درملنه کېږي، او ډېری یې ژر ښه کېږي.


